ACTUALITATES

Grippe aviari: crise sanitari in Turchia

2006-01-12T00:08:00.000+01:00

Turchia se evelia omne dies con un nove caso de grippe aviari. Il ha jam quindece personas infectate per le virus H5N1 e le autoritates investiga circa sexanta possibile nove casos. Hieri mesmo, le ministro de sanitate turchese ha admisse que le pais jammais habeva affrontate un crise tanto grave como iste. Le majoritate del casos declarate in Turchia es localisate al est del pais, in un region de majoritate kurde. Le personas infectate es nunc tractate con Tamiflu. Tamen, le governamento turchese suffre importante accusationes de negligentia e le paises vicin e del Union Europee ha augmentate le controlos de frontiera, le interdiction de importationes aviari e le mensuras de prevention. Anque hieri, le Organisation del Nationes Unite pro le Alimentation e le Agricultura (FAO) ha advertite que le grippe aviari poterea devenir endemic in Turchia e menaciar le paises vicin. Secundo Juan Lubroth, experto in sanitate animal del FAO, le virus poterea propagar se in despecto del mensuras de controlo applicate. Intertanto, in China duo personas infectate per le virus H5N1 es morte iste ultime dies secundo ha recognoscite hieri le governamento chinese.

Iran reprende su activitates nucleari

2006-01-11T00:37:00.000+01:00

Duo annos post le interruption de su programma nucleari, Iran ha decidite reprender lo sub le supervision del AIEA, Agentia International del Energia Atomic. Ben que le vicedirector del organisation iranian del energia atomic, Mohammad Saidi, ha precisate que le activitates nucleari se limita al recerca scientific, le decision de Teheran ha causate deception e enoio in le paises occidental. Teheran insiste super le necessitate del recerca atomic pro su disveloppamento e illo assecura que su fines es pacific. Per via del negotiation, le Union Europee habeva succedite temporalmente a dissuader Iran, que rumpe le accordo in augusto. Le effortios de Russia pro resolver le crise nec ha essitte fructuose. Hieri le autoritates iranian ha comenciate a levar le sigillos que clausurava le installationes nucleri. Le Statos Unite ha menaciate con demandar un resolution del Consilio de Securitate del ONU si Iran non interrumpe itero su programma atomic.

Electiones in Irak

2005-12-15T13:28:00.000+01:00

Hodie la population de Irak elige lor prime governamento desde le invasion american in 2003. Alicun incidentes violente ha essite reportate quando le centros electoral ha aperte iste matino sed le participation sembla numerose. Le presidente irakian, Jalal Talabani, ha demandate al population del pais que iste die deveni un celebration. Circa 15 milliones de citatanos es appellate a votar e on expecta anque que le population sunni participara massivemente. Alicun gruppos insurgente ha appoiate iste electiones sed Al-Qaeda los considera "opera del diabolo". Le fortias de occupation ha adoptate forte mensuras de securitate: le population mesmo debe ir votar a pede proque le autos non pote approximar se al centros electoral pro evitar possibile attentatos terrorista. Circa 150 000 soldatos e agentes de policia irakian patrulia hodie per tote le pais. Plus de 300 partitos e 19 coalitiones concurre a iste electiones, cuje resultatos definitive non se cognoscera usque le fin de iste mense.

Dece soldatos american ha morte in Irak post le explosion de un bomba rebelle

2005-12-03T11:07:00.000+01:00

Desde 2003, plus de 2 100 militares ha morte in Irak. Secundo le rapporto del Washington Institute for Near East Policy, le resistentia contra le occupation in Irak es ancora firme e illo poterea reinfortiar se in le proxime menses. Le rapporto contesta clarmente le successos del Statos Unite in Irak quando le Domo Blanc affirma que le truppas american face progressos contra le fortias rebelle. Heri dece soldatos american ha morte a Faluya post le explosion de un bomba artisanal. Undece altere soldatos es ferite. Intertanto, un gruppo ha sequestrate octo occidentales e illo menacia de executar les le proxime 8 de decembre.

Un grande effusion polluante se extende per un fluvio chinese

2005-11-24T12:03:00.000+01:00

Un strato de benzeno, un producto chimic extrememente nocive, avantia per un area de 80 kilometros del fluvio Songhua, al nord-est de China post le explosion de un planta petrochimic le 13 de novembre in le provincia de Jilin. Le governamento chinese ha recognoscite heri le gravitate del situation post que le pollution ha fortiate le suspension del fornimento de aqua in le urbe de Harbin, capital del provincia de Heilongjiang. Circa nove milliones de personas es concernite nunc per iste mensura. Le population ha collapse iste dies le supermercatos de Harbin pro se procurar aqua imbottiliate e le vicegovernator del provincia mesmo ha debite facer excusas ante le habitantes del urbe. Le governamento chinese ha assecurate que le situation sera controlate iste proxime week-end. Tamen, multe habitantes ha decidite quitar le urbe temporarimente. Intertanto, Russia, pais vicin de China e ubi le fluvio Songhua junge le Amour, declarara le stato de emergentia in iste region a partir del proxime venerdi ben que le autoritate chinese ha affirmate que le pollution non arrivara a terras russe ante duo septimanas.

Le numero de personas infectate per le VIH attinge plus de 40 milliones in 2005

2005-11-21T18:26:00.000+01:00

Onusida, le programma del Nationes Unite contra le sida, ha diffundite hodie su rapporto annual super le stato de iste pandemia in le mundo que indica que le numero de personas affectate per iste mal supera le 40 milliones iste anno. Secundo le rapporto, le augmentation de feminas infectate continua usque representar 43% del casos. Le mortes causate per le sida se eleva a plus de tres milliones in 2005. Desde le identification del VIH, il ha quasi 25 annos, 25 milliones de personas ha morite per culpa de su effectos e le extension del pandemia nec ha cessate iste anno. Con plus de 25 milliones de personas seropositive, le Africa sunsaharian es ancora le region mundial plus affectate. Nunc le pandemia se extende anque per Europa oriental e Asia central. Tamen, le rapporto signala le succesos obtenite in Kenya, Tanzania e Zimbabwe ubi le taxa de infection de femina juvene ha decrescite gratias a le programmas de prevention. Onusida anque rememora que il ha habite progressos in le distribution de medicamentos anti-VIH in le paises paupere ben que ancora 6 milliones de personas seropositive necessita tratamento.

Polemica super le pillula abortive in Italia

2005-11-20T13:36:00.000+01:00

Viginti cinque annos post su creation in Francia, le pillule abortive es ancora prohibite in Italia. Iste ultime dies, le debatto super su legalisation ha essite relanceate per le autoritates sanitari regional. Desde septembre, quando le ministro de sanitate ha poste fin al programma experimental del uso del pillula abortive in un hospital de Torino, le demandas pro su empleo se multiplica. Cinque regiones (Piemonte, Liguria, Lombardia, Umbria e Latio) e le provincia autonome de Trento ha presentate jam petitiones pro poter administrar le pillula. Ultra illo, demandas similar del part de numerose hospitales arriba cata die al Ministerio de Sanitate. Mesmo diverse centros sanitari ha annunciate que illos poterea acquirer le pillula abortive al estraniero. Le Ecclesia Catholic monstra un feroce opposition a un possibile legalisation del pillula. In le referendum super le fecundation assistite le primavera passate, le Conferentia Episcopal italian habeva jam participate activemente e con sucesso in le campania pro le non. Post isto e nunc con iste nove polemica super le pillula abortive, le sinistra e le liberales accusa fortemente le Ecclesia Catholic de ingerentia in le vita politic italian. Intertanto, un association de consumitores ha lanceate un campania de signaturas pro le legalisation del pillula abortive. Plus de 70 000 personas ha jam signate.

Accordo de coalition in Germania

2005-11-19T12:56:00.000+01:00

Duo menses post le electiones, le duo grande partitos german, SPD e CDU/CSU, ha signate un accordo pro governar Germania. Proxime martedi, post le ratification del parlamento, Angela Merkel devenira le prime femina qui occupa le posto de cancellero in Germania. Quasi tote le mundo ha laudate iste accordo que pretende reactivar le economia german sin proponer grande restrictiones in le politicas social. Verdes e liberales es nunc le principal partitos del opposition. Tote le duo habeva poste conditiones multo dur durante le negotiationes de coalition e isto ha finalmente favorite le actual alliantia inter le grande partitos. Ultra illo, le apparition del Partito del Sinistra constitue le altere novitate in le panorama politic german.

Statos Unite continuara a controlar Internet

2005-11-17T16:24:00.000+01:00

Internet es controlate per un organismo sin fin lucrative, le ICANN, site in California (Statos Unite) e, in consequentia, tote le rete es regite per le leges de iste stato american. Le Summitate Mundial super le Societate del Information commencia hodie in Tunis con un documento approbate al unanimitate e qui mantene le control de Statos Unite super Internet. Iste documento es le fructo de plure menses de negotiationes in que le differente partes ha debite facer concessiones. Le ambassator american David Gross ha monstrate su satisfaction pro le accordo attingite. Tamen, le paises in disveloppamento, le Union Europee e organisationes civil demandava un controlo de internet plus equalitari e le internationalisation del ICANN. Le criticas al accordo de Tunis es alora numerose.

Statos Unite nega tote collaboration con Espania pro le transferimento de terroristas

2005-11-16T11:48:00.000+01:00

Le portaparola del Departamento de Stato american, Adam Ereli, ha declarate heri durante un conferentia de pressa que le governamento del Statos Unite non ha recepte alicun petition de information de Espania super le possibile utilisation del aeroporto de Palma de Majorica (Insulas Baleares) del parte del CIA a fin de transferer supposite terroristas. Ereli ha affirmate que ille non esseva al currente de eventual contactos inter le governamentos american e espaniol super iste question. Le portaparola ha rememorate item que Espania es un pais amic e un alliato del Statos Unite intra le OTAN. Intertanto, le Congresso espaniol examina le possibilitate de demandar la comparition del ministro del affaires interior e del director del Centro National de Intelligentia a fin que illes informa super le supposite collaboration espaniola in le transferimento de prisioneros a carceres secrete del parte de Statos Unite.

Ancora tres menses de stato de emergentia in Francia

2005-11-15T19:09:00.000+01:00

Le Assemblea National francese ha approbate un projecto de lege del governamento pro prorogar tres menses le stato de emergentia a fin de finir con le agitationes urban, cuje intensitate ha decrescite notabilemente durante iste ultime dies. Secundo la Lege de Stato de Emergentia, le governamento solmente pote applicar iste mensura de exception durante duodece dies. Ex iste periodo, tote prorogation debe esser approbate per le parlamento. Durante le dece-octave nocte consecutive de agitationes in 120 urbes, le violentes ha incendiate 284 autos e 115 personas ha essite arrestate. Iste datos confirma un diminution del actiones vandalic ab le entrata in vigor del stato de emergentia. Heri vespera, le presidente francese, Jacques Chirac, ha affirmate in un discurso televisate que Francia suffre un crise de identitate que questiona le lege e que le franceses construera nihil sin le respecto.

Mexico annuncia que le relationes con Venezuela se limitara al commercio

2005-11-15T13:50:00.000+01:00

Le ministro mexican de affaires estranie, Luis Ernesto Derbez, ha exigite heri le retiro del ambassator venezuelan in iste pais. Derbez ha annunciate anque que le relationes de Mexico con Venezuela se limitara ab nunc a affaires commercial. Iste mensuras es consequentia del negativa del governamento venezuelan a facer excusas post le declarationes de su presidente, Hugo Chávez, super le mandatario mexican. Le septimana passate, durante su famose programma de television "Aló presidente", Chávez habeva accusate le presidente mexican Fox de esser un "canillo" al servicio del imperio american .

Corea del Nord propone un plano pro eliminar su arsenal nucleari

2005-11-14T12:19:00.000+01:00

Le governamento de Corea del Nord ha proposite un plano pro le suppression progressive de su arsenal nucleari in cinque phases durante le negotiationes multilatere qui ha concluse venerdi in Peking. Secundo iste plano, Corea del Nord non facera plus essayos nucleari ni transferera plus technologia ni producera plus armas nucleari. Iste pais anque ha decise acceptar inspectiones del Agentia International de Energia Atomic e respectar le Tractato de No Proliferation Nucleari. Tamen, le governamento corean ha presentate nove exigentias ante le suspension de su projectos atomic. Tote le interlocutores ha decidite prosequer le conversationes, ben que un data pro nove reuniones non ha essite ancora fixate. In le photo dextra, le missionario corean Kim Gye Gwan, qui ha presentate le plano de desarmamento, applaude le discurso del viceprime ministro chinese Wu Dawei.

Violentia urbana crescente in Francia

2005-11-06T19:43:00.000+01:00

Le violentia reportate in le quartieros peripheric del region parisian durante le septimana passate se extende nunc a altere partes de Francia. Plus de mille autos ha essite incendiate in differente regiones francese durante iste week-end sed le major parte del incidentes violente ha occurrite in Insula-de-Francia. In iste region, mesmo un cellario ha essite incendiate. Le autores de iste violentia urbana es bandas de juvenes de quartieros peripheric e marginal de forte presentia de population arabe e nigre. Le presidente del republica francese, Jacques Chirac, ha reunite hodie un consilio de securitate interne super le violentia in le suburbios del pais. On espera deman un intervention televisate del presidente. Anque le Prime Ministro, Dominique de Villepin, se ha reunite hodie con agentes de policia e preceptores del "zonas urban sensibile". Le governamento fancese supporta numerose criticas pro su actiones e declarationes concercente iste crise. Secundo le prime secretario del Partito Socialista, François Hollande, tote le politicas del governamento es questionate.

Le duo Americas in le conferentia del Mar del Plata

2005-11-04T12:11:00.000+01:00

JASEF HARB. Le 4^e Conferentia del Americas, que reuni , le venerdi 4 et sabatto 5 novembre, in « Mar del Plata » (al sud de Buenos Aires), le chefs de Stato e governo de 34 paises del continente American, signala le affrontamento de duo vision opponite de America, celle del presidente del Statos Unite, George Bush, et celle de su homologo venezolano, Hugo Chavez. Le station balnear del Atlantic esseva transformate in veritabile campo de securitate : policias, soldatos, aviones e nave de guerra. Un manifestation, que debe reunir circa de 40 mil personas es expectate con un marcha anti-Bush que sera ducite per Diego Maradona, le idolo del football argentin. Ille accompaniate del dirigente bolivian, Evo Morales , candidato socialista al election presidential in decembre, del cineasta Emir Kusturica, del pacifista statounitese Cindy Sheenan, del cantador cuban Silvio Rodriguez e del Argentino Adolfo Perez Esquivel, Premio Nobel del pace. Un parte del altermondialistas habava arrivate desde martedi pro assister a un contra-conferentia cuje devisa es "un altere America es possibile" . Defiante Washington, le presidente Chavez previde de esser le venerdi , le solo chef de Stato a participar al « conferentia de populos » ubi ille pronunciara un discurso in un immense stade de football.

Espania: le Congresso del Deputatos accepta tractar le statuto catalan

2005-11-03T11:20:00.000+01:00

Heri, post un passionate debatto de al minus dece horas, le Congresso del Deputatos, le camera del representantes espaniol, ha acceptate considerar le proposition de reforma del statuto de autonomia de Catalonia approbate recentemente per le parlamento de iste pais. Le camera catalan habeva pactate iste reforma in que Catalonia es definite como nation intra Espania. Le presidente espaniol, J.L. Rodríguez Zapatero, ha admitite heri, durante le debatto, que Catalonia ha identitate national e que le reforma de su statuto es necessari. Mariano Rajoy, le capite del prime partito del opposition, le Partito Popular, ha rejectate iste reforma argumentante que illo es contrari al constitution espaniol, in que Espania es definite anque como un nation. Post le acceptation del proposition de reforma, le Congresso debattera e emendara le contento del nove statuto catalan pro adaptar lo al preceptos constitutional. Un longe e difficile processo de negotiationes comencia nunc e su resultato poterea supponer un major federalisation de Espania. Altere communitates autonome como Gallecia ha annunciate que illos exigera le mesme statuto competential que Catalonia.

Violentia in le suburbios parisian: possibile crise de governamento

2005-11-02T10:46:00.000+01:00

Le violentia in le suburbios parisian continua post cinque noctes e con numerose combattos inter le policia e juvenes de quartieros marginal del nord del capital francese. Le juvenes protestante ha combustionate 68 autos e cata nocte illes attacca personas con uniforme. Le situation se ha aggravate con le morte de duo adolescentes jovedi passate e le lanceamento de un bomba lacrimogene in un moschea durante le precaria del dominica. In ambe casos le action del policia ha essite fortemente contestate. Le intervention del prime ministro Dominique de Villepin ha essite necessari pro evitar un crise governamental. Le ministro del affaires interior, le populista Nicolas Sarkozy, defende firmemente le tolerantia zero pro controlar le juvenes del quartieros marginal. Tamen, Sarkozy ha recepte forte criticas pro le actiones policiari e le uso de un semantica guerrier in su declarationes. Iste criticas proveni mesmo de altere membros del governamento, como le Ministro Delegate pro le Equalitate de Oportunitates, Azuz Begag. Intertanto, tres juvenes arrestate durante le combattos del week-end passate ha essite jam condemnate a duo menses de prision. Hodie octo altere suspectes sera judicate.

Cuba nega su implication in le financiamento electoral del presidente brasilian

2005-10-31T10:30:00.000+01:00

Le governamento de Cuba, al traverso de su ambassator in Brasil, ha negate tote implication in le financiamento del campania electoral del actual presidente brasilian, Luiz Inácio Lula da Silva. Le nova de un possibile collaboration economic ha essite diffundite per le revista Veja, qui affirma in su paginas que le partito de Lula, le Partito del Laboratores, haberea recipite de Cuba circa tres milliones de dollares pro financiar su campania electoral de 2002. Le opposition politic brasilian (PFL, PSDB) ha demandate jam un investigation parlamentari del affaire. Si le implication cuban se confirmava, le Partito del Laboratores poterea esser suspendite. Secundo le ambassator cuban in Brasil, Pedro Núñez Mosquera, le informationes del revista Veja es false e iste solmente essaya conditionar le proxime visita a Brasil del presidente del Statos Unite, Geoge W. Bush.

Attentato in Delhi: dozenas de mortes

2005-10-30T20:30:00.000+01:00

Le nocte del sabatto, tres potente explosiones ha causate seriose damnos in le quartiero commercial e in un vicinitate residential del capital indian. Al minus 61 personas ha morte e ancora multe plus es ferite. Le prime bomba ha detonate a 5h45 pm e le altere bombas ha explodite quasi simultaneemente. Le prime ministro indian, Manmohan Singh, ha demandate calma al population in un declaration televisate in que ille ha affirmate que "India ganiara le battalia contra le terrorismo". Le policia ha declarate le stato de emergentia et illa ha claudite le mercatos del citate. Iste explosiones ha occurrite pauc dies ante Diwali, le festival indian del lumine. Necun organisation terrorista ha reclamate totevia le autoria de iste explosiones sed on suspecta que illas poterea haber essite causate pro destabilisar le processo de pace inter India e Pakistan.

Scandalo Plamegate: le filtration del nomine de un spia sparge le Domo Blanc

2005-10-26T11:54:00.000+02:00

Le scandalo Plamegate poterea damnificar le imagine del presidente del Statos Unite, George W. Bush. Duo stricte collaboratores del Domo Blanc poterea esser processate iste septimana accusate de haber revelate le nomine de un spia. Il ha alicun menses, Joseph Wilson, ex diplomate american, habeva denunciate que le Domo Blanc habeva filtrate que su sposa, Valerie Plame, esseva un spia secrete del CIA. Secundo Wilson, iste filtration es un represalia debite a un reporto de Wilson super le possibile emption de uranium in Mali per Irak. In iste documento, Wilson negava le acquisition de iste material per Sadam Hussein contestante assi le motivationes del guerra in Medie Oriente. Nunc Karl Rove, in photo dextra e consiliero del presidente Bush, e Lewis Libby, director del cabinetto del vicepresidente Cheney, es suspecte de haber revelate conscientemente le nomine del spia Plame, lo que es considerate un delicto in le Statos Unite.

Un persona hospitalisate in Portugal post le discoperta de 17 aves morte

2005-10-25T14:56:00.000+02:00

Le autoritates portuguese analysa un possibile secunde foco de grippe aviari post le discoperta de 17 aves morte heri super un plagia propter Lisbona. Iste nove foco, ancora non confirmate, ha essite detegite in un gallinero del localitate septentrional de Santa Maria de Feira. Le aves morte es ancora analysate sed le prime resultatos pare indicar que iste mortes non ha essite causate per le grippe aviari, sed per le febre de Newcastle. Non obstante, le fermero ha essite hospitalisate como mensura de precaution e nunc ille es medicate con Tamiflu. Le resultatos del analyses sera diffundite hodie. Intertanto, le ministro espaniol de agricultura, Elena Espinosa, ha declarate 18 ripas e terras humide de tote Espania como zonas de risco pro le grippe aviari a causa del concentration de aves migratori in iste locos.

Le ONU celebra su 60e anniversario in un momento difficile

2005-10-24T13:18:00.000+02:00

Le Organisation del Nationes Unite celebra hodie le 60e anniversario de su creation con un ceremonia in New York ducte per su presidente, Kofi Annan. Iste celebration arriva in un momento difficile pro le ONU a causa del intense debattos super le reforma de su structura e etiam pro le scandalos de fraude financiari e de abusos sexual in missiones humanitari. Le presidente Annan pronunciara un discurso con qui ille incoragiara le paises membros a assumer le ingagiamentos del Summitate Mundial de septembre passate. Le ceremonia include un homage al empleatos morte in missiones del organisation. Annan, accompaniate per Jan Eliasson, presidente del Assemblea General del ONU, facera sonar etiam la Campana del Harmonia. Le celebrationes conclude de nocte con un concerto includente pièces de Gustav Mahler e Sergei Prokoviev e interpretate per le Orchestra Philharmonic de Stockholm (Sveda).

Wilma quita Mexico pro menaciar Cuba e Florida

2005-10-23T21:12:00.000+02:00

Le passade de le huracan Wilma per Mexico ha costate le vita de octo personas e le disparition de duo. Post rasar la Peninsula de Yucatán, ubi on ha reportate casos de piliage malgrado le presentia del policia, Wilma se ha debilitate usque attinger le categoria de cyclon. Nunc illo se dirige ralentate verso le costa cuban. Le governamento cuban ha evacuate jam 560 000 personas e le presidente Castro ha appellate a le disciplina sabbado passate rememorante que le priotitate debe esser proteger le vitas human. In Florida il pluve jam fortemente e alcun zona costari es inundate duo dias avante le arrivata de Wilma. Le expertos crede que le huracan devenira plus forte super le mare e que un nove cyclon, nominate Alpha e site plus al est, poterea producer alterationes super Wilma e su trajectoria.

Un reporto del ONU implica le autoritates de Syria e Libano in le assassinato de Hariri

2005-10-21T15:46:00.000+02:00

ELPAIS.ES/21.10.2005. Le reporto del commission de investigation inquesitori del Organisation del Nationes Unite super le assassinato del ex prime ministro libanese Rafiq Hariri involve officiales libanese e syriac in le magnicidio. Le reporto es le resultato de le inquestas de un commission ducte per le german Detlec Melhis e create a petition del Consilio de Securitate pro clarar le morte de Hariri e de viginti altere personas in le curso de un attentato in Beirut le 14 de februario . Su publication ha provocate le responsa immediate del governamento syrio, qui affirma que le raporto "es longe del veritate".

Hoteles vacue dum Wilma se approxima

2005-10-21T11:59:00.000+02:00

TIMESONLINE.CO.UK/21.10.05. Desperate touristas, attrappate post le clausura del aeroporto mexican de Cancun, ha essite transferite de hoteles luxuose a albergos de emergentia ante le arrivata del huracan Wilma, de qui le previsiones meteorologic dice que ille deveni plus forte. Cuba ha evacuate plus de 200 000 personas dum le huracan se approxima. Officiales mexican affirma que le huracan, qui ha occidite al minus 13 personas in Haiti e Jamaica, poterea percuter a su maxima velocitate le insula de Cozumel e post colpar Cancun e Cuba. Le meteorologistas dice que post ille poterea mutar su direction verso le nord-est pro arrivar debile a Florida dominica.