ACTUALITATES
segunda-feira, outubro 31, 2005
  Cuba nega su implication in le financiamento electoral del presidente brasilian
Le governamento de Cuba, al traverso de su ambassator in Brasil, ha negate tote implication in le financiamento del campania electoral del actual presidente brasilian, Luiz Inácio Lula da Silva. Le nova de un possibile collaboration economic ha essite diffundite per le revista Veja, qui affirma in su paginas que le partito de Lula, le Partito del Laboratores, haberea recipite de Cuba circa tres milliones de dollares pro financiar su campania electoral de 2002. Le opposition politic brasilian (PFL, PSDB) ha demandate jam un investigation parlamentari del affaire. Si le implication cuban se confirmava, le Partito del Laboratores poterea esser suspendite. Secundo le ambassator cuban in Brasil, Pedro Núñez Mosquera, le informationes del revista Veja es false e iste solmente essaya conditionar le proxime visita a Brasil del presidente del Statos Unite, Geoge W. Bush.
 
domingo, outubro 30, 2005
  Attentato in Delhi: dozenas de mortes
Le nocte del sabatto, tres potente explosiones ha causate seriose damnos in le quartiero commercial e in un vicinitate residential del capital indian. Al minus 61 personas ha morte e ancora multe plus es ferite. Le prime bomba ha detonate a 5h45 pm e le altere bombas ha explodite quasi simultaneemente. Le prime ministro indian, Manmohan Singh, ha demandate calma al population in un declaration televisate in que ille ha affirmate que "India ganiara le battalia contra le terrorismo". Le policia ha declarate le stato de emergentia et illa ha claudite le mercatos del citate. Iste explosiones ha occurrite pauc dies ante Diwali, le festival indian del lumine. Necun organisation terrorista ha reclamate totevia le autoria de iste explosiones sed on suspecta que illas poterea haber essite causate pro destabilisar le processo de pace inter India e Pakistan.
 
quarta-feira, outubro 26, 2005
  Scandalo Plamegate: le filtration del nomine de un spia sparge le Domo Blanc
Le scandalo Plamegate poterea damnificar le imagine del presidente del Statos Unite, George W. Bush. Duo stricte collaboratores del Domo Blanc poterea esser processate iste septimana accusate de haber revelate le nomine de un spia. Il ha alicun menses, Joseph Wilson, ex diplomate american, habeva denunciate que le Domo Blanc habeva filtrate que su sposa, Valerie Plame, esseva un spia secrete del CIA. Secundo Wilson, iste filtration es un represalia debite a un reporto de Wilson super le possibile emption de uranium in Mali per Irak. In iste documento, Wilson negava le acquisition de iste material per Sadam Hussein contestante assi le motivationes del guerra in Medie Oriente. Nunc Karl Rove, in photo dextra e consiliero del presidente Bush, e Lewis Libby, director del cabinetto del vicepresidente Cheney, es suspecte de haber revelate conscientemente le nomine del spia Plame, lo que es considerate un delicto in le Statos Unite.
 
terça-feira, outubro 25, 2005
  Un persona hospitalisate in Portugal post le discoperta de 17 aves morte
Le autoritates portuguese analysa un possibile secunde foco de grippe aviari post le discoperta de 17 aves morte heri super un plagia propter Lisbona. Iste nove foco, ancora non confirmate, ha essite detegite in un gallinero del localitate septentrional de Santa Maria de Feira. Le aves morte es ancora analysate sed le prime resultatos pare indicar que iste mortes non ha essite causate per le grippe aviari, sed per le febre de Newcastle. Non obstante, le fermero ha essite hospitalisate como mensura de precaution e nunc ille es medicate con Tamiflu. Le resultatos del analyses sera diffundite hodie. Intertanto, le ministro espaniol de agricultura, Elena Espinosa, ha declarate 18 ripas e terras humide de tote Espania como zonas de risco pro le grippe aviari a causa del concentration de aves migratori in iste locos.
 
segunda-feira, outubro 24, 2005
  Le ONU celebra su 60e anniversario in un momento difficile
Le Organisation del Nationes Unite celebra hodie le 60e anniversario de su creation con un ceremonia in New York ducte per su presidente, Kofi Annan. Iste celebration arriva in un momento difficile pro le ONU a causa del intense debattos super le reforma de su structura e etiam pro le scandalos de fraude financiari e de abusos sexual in missiones humanitari. Le presidente Annan pronunciara un discurso con qui ille incoragiara le paises membros a assumer le ingagiamentos del Summitate Mundial de septembre passate. Le ceremonia include un homage al empleatos morte in missiones del organisation. Annan, accompaniate per Jan Eliasson, presidente del Assemblea General del ONU, facera sonar etiam la Campana del Harmonia. Le celebrationes conclude de nocte con un concerto includente pièces de Gustav Mahler e Sergei Prokoviev e interpretate per le Orchestra Philharmonic de Stockholm (Sveda).
 
domingo, outubro 23, 2005
  Wilma quita Mexico pro menaciar Cuba e Florida
Le passade de le huracan Wilma per Mexico ha costate le vita de octo personas e le disparition de duo. Post rasar la Peninsula de Yucatán, ubi on ha reportate casos de piliage malgrado le presentia del policia, Wilma se ha debilitate usque attinger le categoria de cyclon. Nunc illo se dirige ralentate verso le costa cuban. Le governamento cuban ha evacuate jam 560 000 personas e le presidente Castro ha appellate a le disciplina sabbado passate rememorante que le priotitate debe esser proteger le vitas human. In Florida il pluve jam fortemente e alcun zona costari es inundate duo dias avante le arrivata de Wilma. Le expertos crede que le huracan devenira plus forte super le mare e que un nove cyclon, nominate Alpha e site plus al est, poterea producer alterationes super Wilma e su trajectoria.
 
sexta-feira, outubro 21, 2005
  Un reporto del ONU implica le autoritates de Syria e Libano in le assassinato de Hariri
ELPAIS.ES/21.10.2005. Le reporto del commission de investigation inquesitori del Organisation del Nationes Unite super le assassinato del ex prime ministro libanese Rafiq Hariri involve officiales libanese e syriac in le magnicidio. Le reporto es le resultato de le inquestas de un commission ducte per le german Detlec Melhis e create a petition del Consilio de Securitate pro clarar le morte de Hariri e de viginti altere personas in le curso de un attentato in Beirut le 14 de februario . Su publication ha provocate le responsa immediate del governamento syrio, qui affirma que le raporto "es longe del veritate".
 
  Hoteles vacue dum Wilma se approxima
TIMESONLINE.CO.UK/21.10.05. Desperate touristas, attrappate post le clausura del aeroporto mexican de Cancun, ha essite transferite de hoteles luxuose a albergos de emergentia ante le arrivata del huracan Wilma, de qui le previsiones meteorologic dice que ille deveni plus forte. Cuba ha evacuate plus de 200 000 personas dum le huracan se approxima. Officiales mexican affirma que le huracan, qui ha occidite al minus 13 personas in Haiti e Jamaica, poterea percuter a su maxima velocitate le insula de Cozumel e post colpar Cancun e Cuba. Le meteorologistas dice que post ille poterea mutar su direction verso le nord-est pro arrivar debile a Florida dominica.
 
quinta-feira, outubro 20, 2005
  Grippe aviari: le paises del Union Europee se mobilisa

LEMONDE.FR 19.10.05 . Grande Britannia ha annunciate mercuridi le emption de 120 milliones de doses de vaccinos contre le grippe aviari pro coperir su population estimate de 60 milliones de habitantes. "Nos usara iste vaccinos pro immunisar le population del Regno Unite e reducer le impacto de un pandemia in le societate" ha declarate le director general del sanitate, Liam Donaldson. Le virus del grippe aviari, si muta, pote provocar le morte de al minus 50 000 personas intra le pais, ha advertite ille dominica.
In Germania, duo statos regional del west, Bade-Wurtemberg e Hesse, ha annunciate mensuras de isolamento del aves de ferma debite al timor de un propagation del grippe aviari, le die sequente a un mensura similar decretate per Bavaria. Le ministro de agricultura de Bade-Wurtemberg ha indicate que ille sperava poter ordinar le clausura del ave de ferma in tote le stato regional, estimante "inapplicabile" un isolamento limitate al fermas site intra zonas de risco. La region, qui ha 16 700 fermas avicule, possede numerose zonas paludose ubi reposa le aves migrator. In Hesse, la mensura de isolamento del contingentes avicul se applica solmente intra zonas de risco.
In Grecia, unic pais del Union ubi le virus H5 ha essite detegite, le governamento ha tentate calmar le opinion public. Le representante del governamento, Theodoro Roussopoulos, ha signalate mercuridi que il no habeva rationes pro se preoccupar quanto al disveloppamento del virus del grippe aviari in le pais. "Tote le examines supplementari realisate in le pais es negative", ha declarate ille precisante que ancora se realisa probas pro saper si le virus detegite es o non del subtypo H5N1, transmissibile al homine. Ultra illo, le ministro del sanitate, Nikitas Kaklamanis, ha viagiate al insula de Inussa, ubi le caso del virus ha essite discoperite. Le ministro ha prandite in le insula optante pro un menu de pullo local.
 
  Nasce Actualitates, la revista de pressa in interlingua
Hodie nasce "Actualitates", un quaderno in linea qui face echo de le novas publicate in le jornales le plus importante del mundo. Le finalitate de iste nove projecto es duple. De un parte, traducente textos de altere linguas, le personas participante potera practicar interlingua e, de un altere parte, iste sera actualisate proque sera usate, scribite e legite. Le personas qui volera participar in "Actualitates" solmente debe commentar o resumer novas actual e inviar las al adresse electronic sequente: mourente@hotmail.com Novas racialiste, masculiste, homophobe o integriste non sera acceptate. Se prefere le novas international. Le nomine o le pseudonymo del traductor sera semper mentionate al fin del articulo con su adresse electronic. Gratias pro tote le collaborationes!
 
"Actualitates" es un quaderno in linea qui face echo de le novas publicate in le jornales le plus importante del mundo. Le personas qui volera participar in "Actualitates" solmente debe commentar o resumer in interlingua novas actual de jornales international e inviar las al adresse electronic sequente: mourente@hotmail.com

A minha fotografia
Nome:
Localização: Santiago de Compostela, Galiza, Spain
ARCHIVES
10.2005 / 11.2005 / 12.2005 / 01.2006 /


Powered by Blogger